جہلم ۔( اقبال خان )کمشنر راولپنڈی انجینئر عامر خٹک کا دورہ جہلم: عوامی خدمت اور گڈ گورننس پر سخت ہدایات. تفصیلات کے مطابق کمشنر راولپنڈی ڈویژن، انجینئر عامر خٹک نے ضلع جہلم کا دورہ کیا دورے کے آغاز میں کمشنر راولپنڈی نے تحصیل پنڈ دادن خان کے مقام پر للہ جہلم ڈوئل کیرج روڈ کی تعمیر کے کام کا جائزہ لیا اور ہدایت کی کہ حکومت پنجاب کی جانب سے مقرر کردہ مدت کے اندر اس روڈ کو ہر صورت میں مکمل کیا جائے اور تعمیر کے دوران اعلی معیار کے مٹیریل کے استعمال کو یقینی بنایا جائے بعد ازاں کمشنر راولپنڈی نے ٹی سی آفس جہلم کا دورہ کیا جہاں منعقدہ ایک اعلیٰ سطحی اجلاس کی صدارت کی۔ اس اجلاس میں ڈپٹی کمشنر جہلم میر رضا اوزگن، ایڈیشنل ڈپٹی کمشنرز سنیہ صافی اور دیگر متعلقہ محکموں کے سربراہان نے شرکت کی۔
کمشنر راولپنڈی نے عوامی فلاح و بہبود اور گڈ گورننس کے ایجنڈے کو آگے بڑھانے کے لیے ضلعی انتظامیہ کو ٹھوس اور فوری اقدامات کرنے کی سخت ہدایات جاری کیں۔
کمشنر راولپنڈی نے وزیراعلیٰ پنجاب کی خصوصی مہم "ستھرا پنجاب” پر زور دیتے ہوئے کہا کہ جہلم شہر اور ملحقہ علاقوں میں صفائی ستھرائی کے انتظامات کو فوری طور پر بین الاقوامی معیار کے مطابق لایا جائے۔ اور صفائی ستھرائی کو یقینی بنانے کے لیے روزانہ کی بنیاد پر موثر مانیٹرنگ کی جائے۔ پیرا فورس کے حوالے سے کمشنر راولپنڈی نے ہدایت کی کہ بازاروں، سڑکوں اور سرکاری زمینوں پر کی گئی تجاوزات کا فوری اور مستقل خاتمہ کیا جائے تاکہ شہریوں کے لیے ٹریفک کی روانی اور آزادانہ نقل و حرکت یقینی بنائی جا سکے ۔ اجلاس میں تجاوزات ہٹانے کے بعد شہر کی خوبصورتی اور شجر کاری کو تیز کیا جائے ۔ انجینئر عامر خٹک نے سرکاری دفاتر کی کارکردگی اور عوامی خدمت کے معیار کو بلند کرنے کے لیے بھی کلیدی ہدایات جاری کیں۔ انہوں نے کہا کہ شہریوں کو ریلیف فراہم کرنا انتظامیہ کی بنیادی ذمہ داری ہے۔ تمام سرکاری دفاتر، خصوصاً ہیلتھ اور ریونیو مراکز کے باہر بڑے سائز کے پینافلکسز آویزاں کیے جائیں جن پر مطلوبہ سروس حاصل کرنے کے لیے درکار تمام دستاویزات اور مقررہ فیس کی تفصیلات درج ہوں۔ اس سے شہریوں کی رہنمائی ہو گی اور بروقت کارروائی ہو سکے گی۔
عوامی شکایات کے بروقت اور شفاف ازالے کے لیے ایک مؤثر میکینزم بنایا جائے تاکہ معلوم ہو سکے کہ کسی درخواست یا شکایت پر کس آفس نے کتنا وقت لگایا ہے۔ اوپن ڈور پالیسی پالیسی کے تحت تمام انتظامی افسران اپنے دفاتر کے دروازے عوام کے لیے کھلے رکھیں اور عوامی مسائل کو ترجیحی بنیادوں پر حل کریں۔ڈپٹی کمشنر میر رضا اوزگن نے کمشنر کو یقین دلایا کہ ان کی ہدایات پر عمل درآمد کو ہر صورت یقینی بنایا جائے گا اور ضلع جہلم کی انتظامی کارکردگی کو وزیر اعلیٰ پنجاب کے گڈ گورننس پروگرام کے مقررہ انڈیکیٹرز کے تحت بہتر سے بہترین بنایا جائے گا۔
