لاہور پنجاب؛ دفعہ 144 کے نفاذ میں 7 دن کی توسیع، نوٹیفکیشن جاری-
محکمہ داخلہ نے 24 اکتوبر تک دفعہ 144 کے نفاذ میں توسیع کا نوٹیفکیشن جاری کر دیا، جس کے مطابق پنجاب میں ہر قسم کے احتجاج، جلسے، جلوس پر پابندی عائد، ریلیوں، دھرنوں، اجتماع اور ایسی تمام سرگرمیوں پر پابندی عائد، چار یا زائد افراد کے عوامی مقامات پر جمع ہونے پر مکمل پابندی ہوگی۔ اسکے علاوہ پنجاب بھر میں ہر قسم کے اسلحہ کی نمائش پر مکمل پابندی عائد، لاؤڈ سپیکر کے استعمال پر بھی مکمل پابندی، اشتعال انگیز، نفرت آمیز یا فرقہ وارانہ مواد کی اشاعت و تقسیم پر بھی پابندی عائد کی گئی ہے۔
کابینہ کمیٹی اجلاس میں دفعہ 144 کے نفاذ میں توسیع کی سفارش کی گئی۔ جس کے بعد محکمہ داخلہ نے دفعہ 144 کے نفاذ میں 7 یوم کی توسیع کر دی۔ توسیع کا فیصلہ امن و امان کے قیام، انسانی جانوں کے تحفظ کیلئے کیا گیا۔
پابندی کا اطلاق شادی کی تقریبات، جنازہ اور تدفین پر نہیں ہوگا۔ اسکے علاوہ سرکاری فرائض کی انجام دہی پر موجود افسران و اہلکار ،عدالتیں مستثنیٰ ہیں۔ لاؤڈ سپیکر صرف اذان اور جمعہ کے خطبہ کیلئے استعمال کئےجا سکتے ہیں۔
محکمہ داخلہ کے مطابق عوامی جلوس و دھرنا دہشت گردوں کیلئے سافٹ ٹارگٹ ہو سکتا ہے۔ عوامی آگاہی کیلئے دفعہ 144 کے نفاذ کی بڑے پیمانے پرتشہیر کی ہدایت کی گئی ہے۔
