وزیراعلیٰ پنجاب کی انسپکشن ٹیم کا  جہلم سوہاوہ میں بڑا ایکشن

وزیراعلیٰ پنجاب کی انسپکشن ٹیم کا  جہلم سوہاوہ میں بڑا ایکشن
​ جہلم (ملک فدا حسین)​وزیراعلیٰ پنجاب کی خصوصی انسپکشن ٹیم نے علی الصبح ضلع جہلم کے مختلف طبی مراکز پر اچانک چھاپے مارے، جس کے نتیجے میں غفلت کے مرتکب متعدد ملازمین کو معطل اور گرفتار کرنے کے احکامات جاری کر دیے گئے ہیں۔
​سوہاوہ: مریضوں کے بستروں پر سونے والے ملازمین گرفتار
​تحصیل ہیڈ کوارٹر (THQ) ہسپتال سوہاوہ میں انسپکشن ٹیم کو انتہائی افسوسناک صورتحال کا سامنا کرنا پڑا۔ معائنے کے دوران معلوم ہوا کہ ہسپتال کا عملہ ڈیوٹی دینے کے بجائے مریضوں کے لیے مختص بستروں پر سو رہا تھا۔ ٹیم نے فوری ایکشن لیتے ہوئے متعلقہ ملازمین کو گرفتار کر کے ان کے خلاف سخت قانونی کارروائی کا حکم دے دیا۔
​علاوہ ازیں، سوہاوہ ہسپتال کے خدمت کاؤنٹر پر تعینات پولیس ملازم بھی غیر حاضر پایا گیا، جسے موقع پر ہی معطل کر دیا گیا۔
​جہلم : ڈی ایم ایس سمیت اعلیٰ حکام معطل
​انسپکشن ٹیم نے ڈسٹرکٹ ہیڈ کوارٹر (DHQ) ہسپتال جہلم اور رورل ہیلتھ سینٹر (RHC) دینہ کا بھی دورہ کیا۔
​ڈی ایچ کیو جہلم: ڈیوٹی سے غیر حاضری اور انتظامات میں کوتاہی پر ڈپٹی میڈیکل سپرنٹنڈنٹ (DMS) سمیت عملے کے دو دیگر ارکان کو فی الفور معطل کرنے کے احکامات جاری کیے گئے۔
​آر ایچ سی دینہ: یہاں بھی صفائی ستھرائی اور عملے کی حاضری کا تفصیلی جائزہ لیا گیا
​عوامی حلقوں کا ردعمل
​وزیراعلیٰ پنجاب کی ٹیم کے اس اچانک اقدام کو عوامی حلقوں کی جانب سے بھرپور پذیرائی مل رہی ہے۔ شہریوں کا کہنا ہے کہ سرکاری ہسپتالوں میں غریب مریضوں کے ساتھ ہونے والی ناانصافیوں کے خاتمے کے لیے ایسے "سرپرائز وزٹس” ناگزیر ہیں۔ عوام نے امید ظاہر کی ہے کہ اس کارروائی سے سرکاری اداروں میں ڈسپلن بہتر ہوگا اور مریضوں کو علاج معالجے کی بہتر سہولیات میسر آئیں گی۔