راولپنڈی: فیلڈ مارشل آرمی چیف سید عاصم منیر کی زیر صدارت 270 ویں کور کمانڈرز کانفرنس میں خضدار حملے میں شہداء کو خراجِ عقیدت پیش کرتے ہوئے بھارتی پراکسیز کی شدید مذمت کی۔
فیلڈ مارشل آرمی چیف سید عاصم منیر کی زیر صدارت 270 ویں کور کمانڈرز کانفرنس جنرل ہیڈ کوارٹرز میں منعقد ہوئی جس میں ملکی اندرونی و بیرونی سیکیورٹی، آپریشنز اور بھارتی اشتعال انگیزی سمیت خطے کی صورت حال کا تفصیلی جائزہ لیا گیا۔
معصوم بچوں کی شہادت انسانیت کے خلاف قابلِ مذمت جرم قرار
کانفرنس کا آغاز بلوچستان کے ضلع خضدار میں دہشت گرد حملے کے شہداء اور آپریشن ’’بنیان مرصوص‘‘ کے شہداء کے ایصالِ ثواب کے لیے فاتحہ خوانی سے ہوا۔
فورم نے اس حملے کو بھارت کی سرپرستی میں چلنے والی دہشت گرد پراکسیز کی کارستانی قرار دیتے ہوئے چار معصوم بچوں اور دو شہریوں کی شہادت کو انسانیت کے خلاف قابلِ مذمت جرم قرار دیا۔
بیرونی جارحیت کا منہ توڑ جواب دینے کا عزم
فورم نے بھارتی اشتعال انگیزی کے جواب میں مسلح افواج کی پیشہ وارانہ حکمتِ عملی اور مؤثر دفاعی ردعمل کو سراہا اور کہا کہ پاکستان کی خودمختاری اور علاقائی سالمیت کے لیے کسی بھی بیرونی جارحیت کا منہ توڑ جواب دیا جائے گا۔
یہ بھی پڑھیں: پاکستان نے بھارت کوایسا سبق سکھایا وہ کبھی نہیں بھولےگا، ڈی جی آئی ایس پی آر
فورم نے آرمی چیف کو اعلیٰ فوجی اعزاز فیلڈ مارشل کے عہدے پر فائز ہونے پر مبارکباد پیش کی، ان کی قومی دفاع سے متعلق بصیرت افروز قیادت، غیر متزلزل عزم اور اسٹریٹیجک وژن کو سراہا۔
شرکائے کانفرنس نے ’’آپریشن بنیان مرصوص‘‘ کی کامیاب تکمیل کو دشمن کے مذموم عزائم کے خلاف ایک فیصلہ کن کامیابی قرار دیا۔
اس موقع پر مسلح افواج، انٹیلی جنس اداروں اور قانون نافذ کرنے والے اداروں کے درمیان ہم آہنگی کو دہشت گردی کے خلاف جنگ میں کلیدی قرار دیا گیا۔
نوجوانوں کے کردار کی بھرپور تعریف
فورم نے بھارتی میڈیا کے جھوٹے پروپیگنڈے اور جنگی جنون کے خلاف پاکستانی میڈیا، انفارمیشن وارئیرز اور نوجوانوں کے کردار کی بھرپور تعریف کی اور انہیں قومی بیانیہ کا اہم ستون قرار دیا۔
بھارتی حمایت یافتہ دہشت گرد تنظیموں کے خلاف کارروائیاں مزید تیز کرنے کا عزم
اجلاس میں بلوچستان اور خیبر پختونخوا میں متحرک بھارتی حمایت یافتہ دہشت گرد تنظیموں کے خلاف کارروائیاں مزید تیز کرنے کے عزم کا اعادہ کیا گیا۔
یہ بھی پڑھیں: آرمی چیف کی تمام محاذوں پر چوکنا رہنے اور فعال تیاریوں کی اہمیت پر زور
فورم نے واضح کیا کہ پہلگام واقعے کی آڑ میں بھارت کی جانب سے پاکستان میں بدامنی پھیلانے کی کوششیں کسی صورت کامیاب نہیں ہونے دی جائیں گی۔
کشمیر میں بھارتی مظالم پر شدید تشویش
کور کمانڈرز نے کشمیر میں بھارتی مظالم پر شدید تشویش کا اظہار کرتے ہوئے عالمی برادری سے فوری اور مؤثر مداخلت کا مطالبہ کیا جب کہ کشمیریوں کی حقِ خودارادیت کی جدوجہد کی سفارتی، اخلاقی اور انسانی حمایت جاری رکھنے کا اعادہ کیا۔
پاکستانی عوام ہماری طاقت کا سرچشمہ ہیں، آرمی چیف
فیلڈ مارشل عاصم منیر نے تمام رینکس کے بلند حوصلے، غیر معمولی صلاحیتوں اور قوم کی غیر متزلزل حمایت کو سراہا اور اس عزم کا اعادہ کیا کہ پاکستان کی مسلح افواج ہر خطرے کے خلاف ملک کے دفاع کے لیے ہر دم تیار ہیں۔
انہوں نے کہا کہ پاکستان کے عوام ہماری طاقت کا سرچشمہ ہیں، ہم ان کے اعتماد پر پورا اُترنے کے لیے پرعزم ہیں
