پاکستان میں پیٹرولیم مصنوعات کی قیمتوں میں مسلسل اضافہ: 10 دنوں میں پیٹرول 34 اور ڈیزل 31 روپے مہنگا
پاکستان میں پیٹرول اور ہائی سپیڈ ڈیزل کی قیمت ایک بار پھر بڑھا دی گئی ہے۔
پیٹرولیم ڈویژن کی جانب سے جاری نوٹیفیکیشن کے مطابق چار روپے 42 پیسے اضافے سے پیٹرول کی نئی قیمت 380 روپے 24 پیسے فی لیٹر، جبکہ چھ روپے 10 پیسے اضافے سے ہائی سپیڈ ڈیزل کی نئی قیمت 409 روپے 42 پیسے فی لیٹر ہو گئی ہے۔
یوں 10 دن کے دوران پیٹرول 34 اور ڈیزل 31 روپے مہنگا ہوا ہے۔
پانچ ستمبر کو پٹرول 345.87 روپے فی لیٹر جبکہ ہائی سپیڈ ڈیزل 378.05 روپے فی لیٹر تھا۔
ایک ماہ کے دوران پیٹرول کی قیمت میں 55، جبکہ ڈیزل کی قیمت میں 25 روپے فی لیٹر اضافہ ہوا۔
14 اگست کو پٹرول کی قیمت 325.43 روپے فی لیٹر جبکہ ہائی سپیڈ ڈیزل کی قیمت 383.95 روپے فی لیٹر مقرر کی گئی تھی۔
امریکہ اور ایران کے درمیان مستقل کشیدگی، خلیجی خطے میں تیل بردار جہازوں پر حملوں اور آبنائے ہرمز میں جہاز رانی کو درپیش خطرات کے باعث عالمی منڈی میں خام تیل کی قیمتوں میں مسلسل اضافہ دیکھا جا رہا ہے۔
اس کے ساتھ ساتھ یمن میں حوثیوں کی جانب سے حملوں اور خطے میں سکیورٹی صورتِ حال سے متعلق خدشات نے توانائی کی عالمی سپلائی کے حوالے سے غیر یقینی صورتحال میں مزید اضافہ کر دیا ہے۔
