کراچی سے حویلیاں جانے والی ہزارہ ایکسپریس کو سوہاوہ ریلوے اسٹیشن کے قریب ایک بار پھر حادثہ،ایک بوگی پٹری سے اتر گئی

سوہاوہ۔( یاسر فہمید)​”ایک ہفتے میں دوسرا اور ایک ماہ کے دوران تیسرا حادثہ! ضلع جہلم میں پاکستان ریلوے کی ناقص دیکھ بھال اور خراب ٹریک کے باعث ٹرین حادثات کا سلسلہ نہ تھم سکا۔ کراچی سے حویلیاں جانے والی ہزارہ ایکسپریس کو سوہاوہ ریلوے اسٹیشن کے قریب ایک بار پھر حادثہ پیش آیا ہے، جہاں ٹرین کی آخری بوگی اچانک پٹری سے اتر گئی۔ خوش قسمتی سے تمام مسافر محفوظ رہے۔ آخر بار بار پیش آنے والے ان حادثات کا ذمہ دار کون ہے؟
​
​سوہاوہ ریلوے اسٹیشن کے قریب کراچی سے حویلیاں جانے والی ہزارہ ایکسپریس حادثے کا شکار ہو گئی۔ ٹرین کی آخری بوگی اچانک پٹری سے اتر گئی، جس کے باعث مسافروں میں شدید خوف و ہراس پھیل گیا۔ تاہم، خوش قسمتی سے کوئی جانی نقصان نہیں ہوا اور تمام مسافر معجزانہ طور پر محفوظ رہے۔
​
​حادثے کی اطلاع ملتے ہی ریلوے حکام اور امدادی ٹیمیں موقع پر پہنچ گئیں۔ فنی ٹیم نے کارروائی کرتے ہوئے ڈی ریل ہونے والی آخری بوگی کو ٹرین سے الگ کر دیا، جس کے بعد ہزارہ ایکسپریس کو مسافروں کے ساتھ منزل کی جانب روانہ کر دیا گیا۔

​مقامی شہریوں کا کہنا ہے کہ سوہاوہ میں ایک ہفتے کے اندر ہزارہ ایکسپریس کا یہ دوسرا حادثہ ہے، جبکہ ضلع جہلم کی حدود میں ایک ہی ماہ کے دوران ٹرین ڈی ریل ہونے کا یہ تیسرا واقعہ ہے۔ ریلوے حکام کے مطابق متاثرہ ٹریک کی مرمت کا کام تیزی سے جاری ہے تاکہ ٹرینوں کی آمدورفت کو جلد از جلد بحال کیا جا سکے۔

​”بار بار پیش آنے والے حادثات ریلوے انتظامیہ کے ٹریک کی دیکھ بھال اور مسافروں کی حفاظت پر سنگین سوالیہ نشان کھڑے کر رہے ہیں۔ عوام کا شدید مطالبہ ہے کہ ناقص ٹریک کی فوری اور مکمل بحالی کو یقینی بنایا جائے تاکہ مستقبل میں کسی بڑے سانحے سے بچا جا سکے