اسسٹنٹ کمشنر دینہ کا تجاوزات کے خلاف گرینڈ آپریشن، سخت وارننگز جاری دکان سے باہر سامان پایا گیا تو بھاری جرمانہ، دوکان سیل اور مقدمہ درج ہوگا: محمد تیمور خان
دینہ: تجاوزات کے خلاف گرینڈ آپریشن، اسسٹنٹ کمشنر کا شہر کا اچانک دورہ، سخت وارننگز جاری
دکان سے باہر سامان پایا گیا تو بھاری جرمانہ، دکان سیل اور مقدمہ درج ہوگا: محمد تیمور خان
دینہ (اقبال خان): اسسٹنٹ کمشنر دینہ محمد تیمور خان نے شہر میں تجاوزات کے خاتمے کے لیے ایک گرینڈ انکروچمنٹ (تجاوزات) آپریشن کے تحت دینہ شہر کا اچانک دورہ کیا۔ اس اہم کارروائی کے دوران پیرا فورس کی ٹیم بھی ان کے ہمراہ تھی تاکہ قانون شکنی کرنے والوں کے خلاف فوری اور سخت اقدامات کو یقینی بنایا جا سکے۔
شہر کے مختلف بازاروں اور تجارتی مراکز کا معائنہ کرتے ہوئے اسسٹنٹ کمشنر دینہ نے دکانداروں کو آخری اور سخت ترین وارننگ جاری کی۔ انہوں نے واضح کیا کہ آئندہ کسی بھی دکاندار کا سامان دکان کی حدود سے باہر پایا گیا تو بغیر کسی رعایت کے بھاری جرمانے عائد کیے جائیں گے، دکانیں سیل کر دی جائیں گی اور ذمہ داران کے خلاف قانونی مقدمات بھی درج کروائے جائیں گے۔
دورے کے دوران میڈیا اور تاجروں سے گفتگو کرتے ہوئے اسسٹنٹ کمشنر محمد تیمور خان کا کہنا تھا:
”شہر میں ٹریفک کے سنگین مسائل اور شہریوں کو خریداری کے دوران پیش آنے والی مشکلات کی سب سے بڑی وجہ یہی ناجائز تجاوزات ہیں۔ دکانداروں کی جانب سے سڑکوں اور فٹ پاتھوں پر قبضہ کرنے کی وجہ سے نہ صرف ٹریفک کا بہاؤ متاثر ہوتا ہے بلکہ یہ شہر کی خوبصورتی پر بھی ایک بڑا داغ ہے۔”
انہوں نے افسوس کا اظہار کرتے ہوئے کہا کہ شہر کے دورے کے دوران دیکھا گیا ہے کہ کوئی بھی دکاندار اپنی سماجی اور اخلاقی ذمہ داری کا مظاہرہ نہیں کر رہا، جس کی وجہ سے شہریوں کا پیدل چلنا بھی محال ہو چکا ہے۔ انہوں نے کہا کہ پنجاب حکومت کی جانب سے تجاوزات کے مکمل خاتمے کی سخت ہدایات موصول ہوئی ہیں اور وزیر اعلیٰ پنجاب کے وژن کے مطابق شہر کو صاف ستھرا اور تجاوزات سے پاک بنانا ہماری اولین ترجیح ہے۔
اسسٹنٹ کمشنر نے دکانداروں پر زور دیا کہ وہ قانون کا احترام کریں اور انتظامیہ کے ساتھ تعاون کریں، ورنہ آئندہ چند روز میں بلاامتیاز قانونی کارروائی کا آغاز کر دیا جائے گا جس کی تمام تر ذمہ داری دکانداروں پر ہوگی۔
